Sermon pour le second dimanche de l'Advent.

L'Evangile que nous lisons en la messe de ce jour est divisé en trois parties. En la premiere il est dit que saint Jean estant en prison pour la justice , il envoya deux de ses disciples à nostre Seigneur pour sçavoir de luy s'il estoit le Messie promis en la loy, ou s'ilz en devoient attendre un autre; la seconde est la response que leur fit nostre Seigneur ; et la troisieme, de ce que nostre Seigneur dit aux Juifs à la louange de saint Jean, apres que ses disciples s'en furent retournés.